Ein merkedag: Nord universitet sin prorektor for forsking og utvikling, Ketil Eiane, dekan Gøril Ursin og konstituert rektor Levi Gårseth-Nesbakk (t.h.) meiner at det nye doktorgradsprogrammet vil gi betydeleg fagleg gevinst, styrkje forskingsaktiviteten og bidra til å vidareutvikle Nord universitet som forskingsinstitusjon. Foto: Hege Eilertsen / Nord universitet.
Dette blir det femte ph.d.-programmet ved universitetet.
Programmet skal leggjast til Fakultet for sjukepleie og helsevitenskap (FSH) og vil bidra til å styrkje forskings- og utdanningsporteføljen ved universitetet.
Vedtaket som vart gjort i dagens styremøte, inneber òg at rektor får i oppdrag å greie ut moglegheita for å utvikle bachelor- og masterprogram innan samfunnstryggleik, som på sikt kan leggje grunnlaget for eit framtidig ph.d.-program på dette området.
Styrkjer eit etablert fagmiljø
Den helsevitskaplege profilen vart vald etter ein omfattande analyse av tre alternative faglege retningar: helsevitskap, innovasjon og entreprenørskap, samt samfunnstryggleik. Analysen viser at helsevitskap er det mest kostnadseffektive og realistiske alternativet, med gode moglegheiter for raskare etablering.
– Fakultet for sjukepleie og helsevitenskap har eit sterkt fagmiljø, rettleiingskompetanse, relevant forskingsinfrastruktur og etablerte masterprogram, som gir eit solid grunnlag for oppstart, seier dekan Gøril Ursin.
– Dette er ei satsing som vil styrkje både forskingskapasiteten og den faglege breidda ved Nord universitet, samstundes som ho svarar på viktige samfunnsbehov, seier konstituert rektor Levi Gårseth-Nesbakk.
Programmet er venta å kunne starte opp i løpet av 2027 eller tidleg i 2028.
Svært samfunnsrelevant satsing
Leiinga ved universitetet ser fram til å etablere det nye doktorgradsprogrammet.
– Helsetenesta står overfor store og komplekse utfordringar, og då treng vi solid, forskingsbasert kunnskap. Det nye doktorgradsprogrammet vil bidra til å styrkje forsking, innovasjon og kunnskapsutvikling som er nødvendig for framtidas helseteneste, seier Ursin.
Vidare vurdering av samfunnstryggleik
Styret og leiinga peikar òg på at samfunnet sitt behov for kompetanse innan beredskap og samfunnstryggleik er betydeleg og aukande. For å kunne etablere eit framtidig doktorgradsprogram på dette området, skal rektor difor undersøkje korleis slike studieløp kan byggjast opp, slik at dette kan bli eit aktuelt alternativ i framtida.
Med desse avgjerdene tek Nord universitet nye steg i utviklinga av forskingsporteføljen, med tydeleg relevans for samfunnet sitt behov for høg kompetanse, både innan helse og samfunnstryggleik.
Eksisterande ph.d-program:
Her finn du meir om Nord universitets forskarutdanningar, og intervju med nokre av dei som disputerte hos oss i fjor.
Eksisterande ph.d-program:
Her finn du meir om Nord universitets forskarutdanningar, og intervju med nokre av dei som disputerte hos oss i fjor.
