Målet er ikkje å finna eitt rett svar, men å utvikla evna til å analysera og forstå fleire ulike perspektiv

Etter mange år i helsevesenet ønskte Malin å omskolera seg, men var usikker på kva retning ho skulle gå vidare. Etter å ha sett igjennom studietilboda ved Nord universitet, var det eit studium som verka spennande.

– Det var bacheloren i sosiologi og samfunnsanalyse som fanga interessa mi. Studiet opnar for mange ulike yrkesmoglegheiter, og dei ulike valemna gir gode høve til å fordjupa seg i det ein sjølv synest er mest relevant og spennande.

Refleksjon framfor enkle fasitsvar

Malin fortel at ho vil tilrå studieprogrammet til alle som er nysgjerrige på korleis samfunnet fungerer.

– Studiet passar for deg som liker å reflektera over årsaker og samanhengar framfor å leita etter enkle fasitsvar. Studiet gir ei god forståing av kvifor samfunnet er som det er, og dessutan korleis det har utvikla seg over tid. Målet er ikkje alltid å finna eitt rett svar, men å utvikla evna til å analysera og forstå fleire ulike perspektiv.

Trygt studiemiljø

I ein liten klasse har det vore lett å bli kjent med medstudentane.

– Studiemiljøet blir opplevd som inkluderande, og det har vore lett å bli kjent med dei andre studentane. Kullet har vore passe lite, noko som gjer at ein raskt blir trygg på kvarandre. Det er rom for ulike meiningar og perspektiv, noko som er viktig når ein prøver å læra eit fag der refleksjon og samtale står sentralt. Samtidig er forelesarane tilgjengelege og engasjerte, og det bidreg til ein trygg og god læringsarena.

Tips til nye studentar

Malin har eit konkret tips til andre som kan tenkja seg å studera sosiologi og samfunnsanalyse.

– Førebu deg til forelesingane! Det høyrest kanskje litt kjedeleg og sjølvsagt ut, men utbyttet blir mykje større når du har sett deg inn i stoffet på førehand. Då blir det også lettare å følgja resonnementa og delta aktivt. Ikkje ver redd for å stilla spørsmål undervegs dersom noko er uklart. Aktive forelesingar gir betre læring for alle, og forelesarane ønskjer at studentane skal forstå det som blir gjennomgått.

– Eg vil også tilrå å laga ein eigen liten «ordbok» med forklaringar på fagomgrep og akademiske uttrykk. Det gjer det enklare å lesa pensum etter kvart, og gir ei betre oversikt over kva omgrepa faktisk betyr, avsluttar Malin Catharina Kjerkreit.

Aktive forelesingar gir betre læring for alle, og forelesarane ønskjer at studentane skal forstå det som blir gjennomgått.

Malin Catharina Kjerkreit